"بيتنا هيقع والمياه فيها ماس كهربائي.. أسرة بالبحيرة تستغيث: عاملين سقالات نمشي عليها

حالة من القلق والذعر تعيشها أسرة بعزبة الحبروك التابعة لمركز دمنهور بمحافظة البحيرة، بعد تكرار طفح المياه من أرضية المنزل بشكل مفاجئ، ووصول الأمر إلى تكهرب الأرض والمياه ـ حسب روايتهم ـ ما يهدد حياة الأطفال وسيدة مسنة تجاوزت الثمانين عامًا.

لمشاهدة الفيديو إضغط هنا

يقول رضا جلال، أحد قاطني المنزل: أنا مولد هنا وعايش في المنزل منذ سنوات طويلة وعمرنا ما شفنا اللي بيحصل ده، المياه فجأة بتطلع من الأرضية مرة واحدة، لدرجة إننا غيرنا الأرضية مرتين، وعملنا طبقة خرسانة فوق البلاط وطبقة كمان تحته، لكن نشيل من هنا تطلع من هنا.

أزمة متكررة

ويضيف أن الأزمة لم تعد مقتصرة على طفح المياه فقط، بل امتدت إلى تسرب الكهرباء داخل المياه، قائلا: الجديد النهارده إن المياه بقى فيها كهربا، بنتي الصغيرة اتكهربت وهي ماشية جوه البيت، وحطينا سقالات خشب على الأرض عشان نعزل الميه والكهربا، وبنمشي عليها بالعافية.

مخاوف من إنهيار المنزل

الأسرة تؤكد أن المياه تملأ المنزل بشكل شبه أسبوعي، ما يتسبب في تلفيات مستمرة بالأرضيات والحوائط، وسط مخاوف من انهيار أجزاء من العقار، قائلين: الأرض بتكهرب والحيطان بتنهار، ومش عارفين نعمل إيه، والبيت بقاله أسبوع غرقان مياه وتعيش داخل المنزل سيدة مسنة تبلغ من العمر 80 عامًا، تعاني من عجز حركي كامل، ما يزيد من صعوبة الموقف، ويقول نجلها: والدتي قاعدة على الأرض ومش قادرة تتحرك أو تطلع السلم، وخايفين عليها وعلى العيال، أي شرارة ممكن تعمل كارثة.

مطالب بإيجاد حلول

وتطالب الأسرة بسرعة تدخل الجهات المعنية لفحص أسباب طفح المياه، وإدخالهم علي شبكة الصرف الصحي العمومية، مؤكدين أن الحلول المؤقتة لم تعد مجدية، قائلين: إحنا مش عايزين حاجة غير حل جذري، عايزين المجاري العمومية تدخلنا، لأن الوضع ده مش هينفع يكمل، ونحن في انتظار تحرك الجهات المختصة لإنقاذنا.

البحيرة