سبعة أسئلة هامة لكل أم

مهم جدا فى هذه الفترة لان قضايا التحرش الجديدة زادت أو بقت بتكتشف مؤخرا.
ازاي ممكن تعرفي إن ابنك اتعرض أو بيتعرض للتحرش بنفسك وبأسئلة سهلة ولكن بطريقة مختلفة غير صريحة أكتر غلطة بتقع فيها الأمهات إنهم يسألوا الطفل بشكل مباشر جدا
حد لمس جسمك حد ضايقك.
والطفل ساعتها يا إما يتخض يا إما يتكسف ومايعترفش لو كان لا قدر الله بيتعرض لحاجة فعلا علشان كده المهم نسأل بطريقة آمنة مطمئنة وما فيهاش إيحاءات.
فى حوار مع الدكتور عماد غنيم أخصائي تنمية بشرية ودراسات فى علم الاجتماع
اشار إلى اهم سبعة اسئلة لكل أم مع ابنائها وطريقة السؤال وأهداف كل سؤال.

السؤال الأول
مين اكتر حد بتحب تلعب معاه ومين اقل حد بتحب تلعب معاه وليه
الهدف منه معرفة العلاقات اللي فيها راحة.
والعلاقات اللي فيها قلق أو تجنب ليه السؤال ده يفتح قلبه لإنه بيحس إنه سؤال طبيعي عن يومه مش تحقيق فيتكلم تلقائيا.

السؤال الثانى
في حد ساعات بيعمل حاجات بتزعلك أو بتضايقك ومش بتعرف تقول
الهدف فتح باب الاعتراف بشكل عام قبل ما ندخل للتفاصيل والسؤال هنا مش موجه لشخص محدد فالطفل بيحس إنه مش مضطر يحمي حد أو يخاف من عقاب.

السؤال الثالث
لو حد عمل حاجة انت مش بتحبها بتعمل ايه
الهدف تعرفي مهاراته في الحماية وهل اتعرض لحاجة قبل كده ورد فعله كان ضعيف ولا لأ
السؤال ده بيكشف لو حصل موقف وهو مقدرش يدافع وغالبا الطفل لو مر بتجربة تحرش فعلا فيا اما هيسكت أو هيعيط.

السؤال الرابع
في حد بيطلب منك أسرار أو بيقولك ما تحكيش لماما.
الهدف كشف أول علامة للتحرش وهي السرية والسيطرة والتخويف والسؤال ده مهم جدا لأنه سؤال عام يقدر الطفل يجاوب من غير ما يحس إن في مصيبة.

السؤال الخامس
في حد بيحضنك أو بيلممس جسمك بطريقة بتخليك متضايق
الهدف تسمية المشاعر بدل الكلمات الجنسية.
ولازم هنا يكون فيه شعور بالأمان غالب على السؤال لإنه هيكون مبني على احساس الطفل مش على وصف الفعل والطفل بطبيعته صادق جدا في وصف الضيق لو في حاجة حصلت.

السؤال السادس
لو انت متضايق من حد أو من موقف تحب تقولي ازاي بالكلام ولا بالرسم
الهدف فتح قناة تانية للتعبير الرسم بيكشف حاجات الطفل مش قادر ينطقها
ولما تختاري طريقة التعبير اللي هو مرتاح ليها امانه بيزيد ورفضه يقل وبيتطمن.

السؤال السابع
في أي حاجة حصلت الأيام دي وخليتك مش فاهم أو حسستك إنك مكسوف
الهدف الوصول للمواقف اللي الطفل مش قادر يصنفها وخايف يتكلم فيها
وده سؤال قوي ومحتاج صبر واحتواء لان التحرش عند الطفل غالبا بيكون شعور بالخجل مش فهم للفعل.

الهدف ازاي تخلي الطفل يجاوب بصدق ومن غير خوف اتكلمي بنبرة صوت هادية جدا الطفل بيجاوب على النبرة قبل السؤال.
اقعدي على مستواه الركبة عند الركبة علشان يحس بالأمان أو نايمين ع السرير جمب بعض قبل النوم ما تبينيش أي صدمة أو خوف حتى لو قال حاجة مفزعة لو اتخضيتي هيسكت وابدئي بجمل طمأنة انا مفيش حاجة بتزعلني منكم ولو في اي حاجة حصلت عمري ما هلومك ممكن تسأليه وانتي في نشاط جانبي زي تلوين أو مكعبات ده بيخلي الحوار طبيعي والطفل يفتح قلبه بسهولة ما تكرريش السؤال اكتر من مرة واختاري وقت يكون فيه هادي ومرتاح وفى بينكم كلام وطبعا ماتمسكيش الموبايل وانتى بتقرئي الأسئلة.
التحرش بالأطفال بيحصل في الأماكن اللي مبنتوقعهاش فمش دورك انك تحميه في كل مكان هيتواجد فيه لكن مهم جدا توعيه إنه يتكلم ويعبر ويحاول يشرح اللي بيتعرض له بأمان عشان واثق إنك هتدعميه وإنك هتساعديه يحمي نفسه بنفسه.
كل الشكر والتقدير للدكتور عماد غنيم
إلى اللقاء.

قرمشة
بعض الناس مثل العطسة عندما يخرجوا من حياتك عليك ان تقول الحمدلله

بعض الأشياء تنتهي ظاهريا فقط
ولكنها في نفوس أصحابها تبقى إلى الأبد.

من باب الأدب استمع للبشر جيدا أما من باب الاحتياط فلا تصدق كل ما يقولون
تحياتى ومن عندياتى.