هبه عبد العزيز تكتب: قطايف من غير مكسرات

هبه عبد العزيز تكتب : قطايف من غير مكسرات

-لما سألوا "جبران خليل جبران" عن أكتر شيء مدهش في  عالم البشر ؟ 
فرد عليهم  : 
(البشر يملون من الطفولة ، يسارعون ليكبروا ، ثم يتوقون إلى أن يعودوا أطفالاً ثانية ، يضيعون صحتهم ليجمعوا المال ، ثم يصرفونه ليستعيدوا الصحة . .  يفكرون بالمستقبل بقلق ، وينسَون الحاضر ، فلا يعيشون الحاضر ولا المستقبل . . يعيشون كما لو أنهم لن يموتوا أبداً ، ويموتون كما لو أنهم لم يعيشوا أبداً …).

عيشوا "اللحظة" يا جماعة … لأن ده الشىء الحقيقى الوحيد تقريبا اللى بنملكه.

-"نيلى" الفزورة التى لم يحلها أحد ..

وأنا بشوف فوازير  "التمبوكا" اللى بتتعرض بعد المغرب على قناة "ماسبيرو زمان" واللى تم إنتاجها سنة 1978 .. إفتكرت عمنا "صلاح جاهين" لما شاف "نيلى" فى الفوازير فقال عنها : عالجتني من الإكتئاب ، وإفتكرت كمان لما  "صفاء أبو السعود" فى أحد حلقات برنامجها التلفزيونى سألت "نيلى": معروف عنك إنك بترفضي أعمال فنية كتير ؟؟ فردت "نيلى" بما معناه : إنها بتحترم جمهورها ، وتاريخها الفنى ، ولو العمل اللى هتقدمه مش هيبقى فيه إضافة وشىء مفيد يبقى لايمكن تقبله ، والقرار ده خلاها أكيد ماتعملش فلوس كتير ، لكنها عملت جمهور كبير ..
"نيلى" واحشتينا كتير كتييييييير ، وواحشنا "الحس الواعى للفنان".

-من ساعة ما بدأت 2025  ولسه مافيش أى جديد في أى حاجة .
فأنت الآن على باقة بعد رمضان إن شاء الله أو بعد العيد  بإذن الله... الدنيا لسه فى السلانكسية خالص.
-الفنان "أحمد سعد" مشارك معانا السنة ديه فى حوالى ٥ أو ٦ حملات إعلانية تقريبا.
هو ربنا يزيده طبعا، بس هل ده مؤشر على ضعف المواهب الفنية في مصر مثلا !؟ ولا السبوبة تحكم؟؟
آسف إننا جامدين واللى بتلاقيه عندنا مش بتلاقيه عند التانيين.

-لاعب الكرة الشهير  "أبوتريكة " وعن ظهوره  في إعلان "ستاد الأهلي الجديد"  وحالة الجدل المصاحبه !؟ .
محتاجين بس نفهم من أصحاب القرار، والقنوات : هل هو إرهابي ولا رمز رياضي !!!!؟؟؟.
آسف لولاد الكار وللمواقع اللى مش لاقيه أفكار ولكل واحد مكار .

-من وحي برامج "دور على الفضايح" و "إعملنى  تريند والنبى يا أبنى عل السوشيال ميديا
المخرجة : صافى يا لبن 
المذيعة :   مووووووه … حليب يا قيشطة …. خلااااااص 
المخرجة : يلا إبتدى بقى يلا  ..
المذيعة : بحبيك يا إيناس .. 
المخرجة : وانا كمان بحبيك .. 
المذيعة : وأنا والله … اااااه  يعنى قلبى فظييييييع مممم فظييييييع .. 
المخرجة : وأنا والله يا بسمة ما زعلت منك ، وبقيييت أقول. %_#*%€£ … وعمرى ما رديت عليكى … عوووووومرررررى ما رديت … ختشى بالك!.
المذيعة : ماكوووووتيش تقدرى ماكووووتيش … 
المخرجة : تانى … تانى … تانى 
المذيعة : طلعونا فاصل ما طللعوناااااا فاصل… 
مطلب جماعى يا جماعة   : يا ريت تطلعوا فاصل للآبد ، أو مجبرين ننام بدرى بعد كده  

-من وحي برامج المقالب الفيك.. ‏رامز جلال تقريبا جايب كل السيئين في روايات الآخرين!!

-أول مدربة كرة قدم للرجال فى مصر …
وف شهر المرأة وبمناسبة يوم المرأة العالمى اللى فات ويوم المرأة المصرية اللى جاى .. حابين نقول لحفيدة الفراعنة والفرعونات بنت الجنوب "فايزة حيدر" البطلة الصعيدية  اللى حققت المركز التالت على مستوى العالم مع منتخب مصر لذوى الهمم  قبل كده ، كل سنة وإنت طيبة يا أيقونة الكرة النسائية..

-من الدنمارك …
فيه مكتبة هناك إسمها "مكتبة الإنسان" المكتبة ديه تقدر تستعير منها شخص لمدة 30 دقيقة ، والشخص ده بيبقى عنده قصص مفيدة فى حياته … بيحكيها .
الفكرة ديه لو أطبقت هنا هيتحكى حكااااااايااااااات !!!؟؟؟ comming soon

-برنامج "مدفع رمضان" للفنان "محمد رمضان" بيقدم فكرة مختلفة السنة ديه ممكن ما تكونش جديدة ولا فيها إجتهاد عشان تكون جذابة بشكل جيد للجمهور، لكن على الأقل الفلوس فيها بتروح كل يوم للناس اللى تستاهلها بجد ومحتاجها حقيقى ،بدل ما كانت بتروح عل الأرض أو للهيافة والتفاهة .. 
أحسنت يا نبر وان

-من قلب إعلانات الشهر الكريم.. ممكن حد يفسر ليا هو إيه حنفية " البلوجرز" اللي فتحت دي مرة واحدة في الإعلانات؟! ياجماعة "فن وعلم التسويق" بيقول مش لازم كلكم تقلدوا بعض …الإفيه بقى دمه تقيل أووووى بجد..

-الفرق كبير جدا.. مابين إستثمار النجاح وإستغلال النجاح !؟
"إستلام فورى" للبلوجر "إسلام فوزي" والحقيقة مصدومة أو خليها مندهشة .. القناة قناتنا بقى ، والبرنامج من إنتاجنا وبفلوسنا وكده، والمحتوى اللى ملوش لازمة ده بيخدم على مسلسلاتنا برده اللى إحنا صارفين عليها … وكلها فى بيتها يعنى!! لكن فى الحقيقة … أكبر خسارة هى (المشاهد) اللى السيناريو المستهلك والعبثى ده أثبت فشله تماما فى جذبه للآسف الشديد … 
عزيزى المشاهد حقك عليا …

-ألفين سلامة على لاعب الزمالك الشاب "إبراهيم شيكا" اللي أصيب بالمرض اللعين ،وكل التحية والحب والأمتنان للفنان المطرب" تامر حسني" على دعمه ل (شيكا) اللى ربنا يشفيه ويعافيه ، "تامر" إنت محترم لأنك بتجسد لنا (فكرة الفنان الإنسان) ودوره فى المجتمع ، وبتأكد لنا على المعنى المهم ده، وبتقدم القدوة لزمايلك وجمهورك. 
وعلامة إستفهام غير مفهومة لمجلس إدارة الزمالك وأعضاء لجنة التخطيط هو إنتوا فين يا جماعة ؟ اختفيتواااااا ليه ها ليه؟

-سؤال فى الكورة : 
هى ماتشات الأهلي في كأس العالم أشترتها أون سبورت ، ولا MBC مصر عشان حصلي error بعد شوية البيانات اللي طلعت فجأة؟؟!!.

-من مدينة الإنتاج الإعلامي : 
التغيرات الآخيرة اللي حصلت في الشركة الكبيرة …  منتظرين نشوف تطوير حقيقى على أرض الواقع عشان نقدر نكون إحنا كمان وجهة نظر حقيقية عن شغلهم …
وبلاش كل مذيعة" تتقمص" من أختها عشان الأتوكيو  عطلان .. صفى النية يا بنتى إنت وهى .

-من عند البنزينة.. 
هو الواحد ممكن يقسط بنزين عربيته بعد كدة؟! ولا ياخد قرض أحسن ولا إيه؟

-من وحي الدراما فى (أش أش ) و (العتاولة) .. "مي عمر" و "مى القاضي" …مي ومى … وكأن الرقص بقى طبق رقصى قصدى رئيسى على مائدة الدراما فى رمضان 
"فى رمضان"  !!! بصوت الفنان "عمرو مصطفى" اللى بنتمنى له المعافاة والشفاء العاجل آمين.

-العبقري اللي أقنع "إيمى سمير غانم" و"حسن الرداد" إنهم ينفع يقدموا كوميديا ، ده عامل بالظبط زي اللي اقنع الناس إن كارت الكهربا ابو ١٠٠ جنية بيقعد يومين!؟

-آخر حاجة كلها كام يوم ويتم إختيار مجلس جديد ل "نقابة الصحفيين" مطلوب تنفيذ الوعود والإلتزام بالعهود، وترجمة ده ل تطور أفضل في الخدمات العلاجية، وتسهيل أكبر في الضمانات البنكية، وتعديل أو زيادة البدل، والأهم من كل ده حسم موقف الغير مقيدين في جدول نقابة الصحفيين وبالتوفيق للجميع..