"من حقنا نفهم".. لميس الحديدي تهاجم رئيس مجلس الوزراء بعد زيادة ساعات قطع الكهرباء
بعد إعلان الحكومة زيادة عدد ساعات قطع الكهرباء في جميع محافظات الجمهورية عن معدل ساعتين، لتكون 3 ساعات في حين تصل لمعدل 4 ساعات في بعض المحافظات، كما أعلنت محافظة بورسعيد.
لميس الحديدي تعلق على أزمة انقطاع الكهرباء
قامت الإعلامية لميس الحديدي، بالتعليق عبر الصفحة الرسمية لها على موقع "إكس" تويتر مسبقًا، على آخر المستجدات بشأن زيادة عدد ساعات قطع الكهرباء في مختلف المحافظات، مبينة رفضها التام لما يحدث، مشددة على أن الكهرباء ليست رفاهية.
وقالت الحديدي عبر تعليقها: «يعنى إيه قطع الكهرباء 4 ساعات في حرارة 43 ودون مواعيد محددة؟.. فيه ناس كبيرة لا تتحمل، وناس عيانة وطلبة بيذاكروا وناس بتتعلق في المصاعد، حتى الناس العادية ده أبسط حقوقها».
وأضافت الحديدي: «الكهربا ليست رفاهية، ده حق المواطن ودور الدولة، الناس أهم من أرقام الموازنة الصماء بتاعة الفائض الأولي».
لميس الحديدي تشن هجوم على رئيس مجلس الوزراء
وتابعت الحديدي: "لو بورسعيد الكهرباء بتقطع فيها 4 ساعات.. محافظات الصعيد بتقطع فيها كام ساعة، قطع الكهرباء يعنى قطع الميه يعنى قطع التليفون والإنترنت وخراب الأجهزة الكهربائية.. مين هيعوض الناس عن كل ده، وفى النهاية فين آفق الحل، لازم نعرف ده حقنا".
ووجهت الحديدي رسالة إلى الدكتور مصطفى مدبولي، رئيس مجلس الوزراء الحالي، قائلة: "إلى رئيس مجلس الوزراء المشغول بتشكيل الحكومة: فيه فلوس أهو لاستيراد الغاز غير فلوس رأس الحكمة، صندوق النقد، واستثمارات الأجانب في أدوات الدين 30 مليار دولار.. ليه مش بنستورد غاز للكهرباء بدل بهدلتنا دي".
وأضافت الحديدي في رسالتها الموجهه لرئيس مجلس الوزراء: «ما تقولوش إن الفلوس كلها راحت سداد ديون! لإننا لم نسدد كل ديون شركات البترول الاجنبيه ودا أحد اسباب نقص الغاز؛ الفلوس اتصرفت فين؟ عاوزين إجابة ده حقنا.. وليه مكنش عندك أي تخطيط أصلا لنقص الغاز وبلاش بقى قصة موجه الحر المفاجأة لأنك بتقطع الكهربا في الحر والبرد».
