بسبب 300 جنيه.. ننشر اعترافات المتهم بقتل شاب بسلاح أبيض ببولاق الدكرور| خاص
حصل موقع "الفجر" على أقوال المتهم محمد عويمر صاحب 28 عامًا من عمره متهم بقتل شاب بسبب مطالبته بفلوسه بمنطقة بولاق الدكرور.
جاء في تحقيقات النيابة العامة للمتهم في القضية رقم 23090 لسنة 2023 جنايات بولاق الدكرور كالتالي:
س: ما تفصيلات القرارك ؟
اللي حصل أن مصطفي صحبي من نحو ثلاث شهور أتعرفت عليه في موقف العشرين، وفي يوم استلفت منه 300 جنيه عشان كنت مزنوق وقولتله هدهملك كمان كام يوم، وهو قعد يزن عليا عاوزهم كل يوم، وأنا معييش فلوس لحد ما قابلني يوم الجمعة في العشرين ووقفني وقالي فين الفلوس أنا عاوزها يأاسطي دلوقت، قولتله معييش قالي مش محلك النهاردة ومسك فيا وضربني ووقعني في الأرض لحد ما الناس حاشت بينا وأنا بقوم لاقيت حتة حديدة في الأرض، فمسكتها وبهوشه بيها راحت جت في دماغة من ورا وقعد يضربني بالبونيات في وشي لحد ما الناس بعدونا عن بعض ومشوه.
واستكمل: وأنا مشيت روحت وبعدها حاولت أوصله عشان أراضيه واديله الفلوس وقعدت ثلاث أيام أدور عليه ملقتوش لحد ما أول أمبارح لاقيت أتنين راكبين توكتوك وقفوني قالولي انت محمد عامر قولتلهم أيوه راحوا خدوني وسطهم وطلعوا بيا على مركز كرداسة وقعدت يومين وعرضوني النهاردة على النيابة.
س: متي وأين حدثت تلك الأحداث ؟
أحنا اتخانقنا أنا ومصطفي يوم الجمعة
نحو الساعة 3 العصر في شارع أبو زيد من شارع العشرين
س: ما ظروف نشأتك تحديدًا ؟
أنا أتولدت في محافظة المنيا وأبويا عاجز مش بيشتغل وأمي ربة منزل وعندي سبع اخوات ست صبيان وبنت وأنا مكملتش تعليم وشغال سواق على خط العشرين.
أحالت النيابة العامة المتهمين "محمد عويمر" 28 سنة سائق، "محمد عادل" 23 سنة سائق، لمحكمة الجنايات المختصة بدائرة محكمة استئناف القاهرة لمعاقبة المتهمين بعد أن وجهت إليهم تهمه قتل شخص.
جاء في أمر الإحالة في القضية رقم 23090 لسنة 2023 جنايات بولاق الدكرور، أن المتهمين ضربا المجني عليه "مصطفي.ي" عمدًا لخلاف مالي استمر بينهما، وما أن ظفروا به حتي قام المتهم الثاني برش مادة حارقة بوجه ليتمكن الأول من تسديد له ضربة بسلاحه الأبيض استقرت برأسه فأحدثا إصابته الموصوفة بتقرير الصفة التشريحية والتي أودت بحياته، دون أن يقصدوا من ذلك قتلا، ولكن الضرب أفضي إلى موته.
كما وجه إليهم تهمه إحراز بغير ترخيص سلاح أبيض وادوات (مطواة- بخاخ رادع) مما يستخدم في الاعتداء على الأشخاص علي النحو المبين بالتحقيقات.
ووجهت للمتهم الثاني احراز بقصد الاتجار جوهر الهيروين في غير الأحوال المصرح بها قانونا.
يكون المتهمان قد ارتكبا الجناية والجنحة المؤثمة بالمواد: ١/٢٣٦ من قانون العقوبات، والمواد ۱، ۲، ۱/۲٤ بند ز ٢ بند ٦، ١/٤٢ من القانون رقم ۱۸۲ لسنة ١٩٦٠ المعدل بالقانون رقم ۱۲۲ لسنة ۱۹۸۹ والبند رقم (۲) من القسم الأول من الجدول رقم (1) الملحق بالقانون الأول والمعدل بقرار وزير الصحة رقم ٤٦ لسنة ۱۹۹۷ والمواد ۱/۱، ۲۵ مكرر / ۱،۱/۳۰، من القانون رقم ٣٩٤ لسنة ١٩٥٤ المعدل بالقوانين أرقام ٧٥ لسنة ١٩٥٨، ١٦٥ لسنة ۱۹۸۱، ۵ لسنة ۲۰۱۹ والبندين رقمي (٥-٧) من الجدول رقم (۱) الملحق بالقانون الأول والمعدل بقرار وزير الداخلية رقم ١٧٥٦ لسنة ٠٢٠٠٧
