استدرجوه للصلح بنية القتل.. دموع أم تحكي قصة مقتل ابنها على يد 4 أشخاص بشبرا الخيمة|بث مباشر

شهد شارع الصفتي بمنطقة شبرا الخيمة، واقعة قتل كانت بدايتها غيرة ونهايتها غدر، راح ضحيتها شاب في مقتبل عمره، علي يد 4 أشخاص، طلبوا منه الصلح فوافق وذهب معهم، لكنهم تربصوا له وقتلوه بسلاح ناري فوق السطوح بمنزلهم، ولمعرفة تفاصيل أكثر عن الواقعة، ذهبت محررة "الفجر" لمنزل المجني عليه "محمد الفيشاوي" للتواصل مع أهله.

ظهر علي منزل المجني عليه محمد الفيشاوي علامات الصمت والحزن، فعندما دخلت محررة "الفجر" الشقة شاهدت إضاءات ضعيفة والجميع يجلس في ركن يقرأ القرآن وعلامات الحزن على وجههم.

وبالحديث مع والدة المجني عليه قالت "ابني كان عنده أحلام كتيره عايز يعملها كان بياخد كورسات عشان يطور من نفسه، وكان متطلع للحياة ومهتم بلبسه وشكله، لكن الغيرة والحقد اللي في قلوب الناس أخدته مني".

وقالت والدة ضحية الغدر: بداية المشكلة اللي حصلت مع ابني والقتلة، كانت قبل جريمة القتل ب15 يوم، قالوله حلوة الهدوم اللي انت لبسها دي، وعشان انا مكنش بستريح للناس دي قولتله ابعد عنهم ومتكلمهش، لكن هما مكنوش سايبينه في حاله، واحد منهم طلب رنة تليفون من عنده فرفض، اتخانقوا بعديها مع بعض وقالوه انت شايف نفسك علينا ليه".

واستكملت حدثيها: "بعديها بـ15 يوم طلبوه من ابني يروحلهم البيت عشان يتصالحوا، وقالي ياماما عشان مش عايز أعمل عداءات مع حد، واخد الناس على عيوبها هنتصالح عشان يشلوني من دماغهم".

وأردفت: ابني راح معاهم البيت عشان يتصالح، لكن بعديها لقيت حد بيرن عليا وبيقولي ابنك مات، مصدقتش نفسي ولقيت الرقم بيرن تاني وبتقولي تعالي خدي ابنك في شارع عرابي، نزلت حافيه وجريت في الشوارع مش عارفه راحة فين".

وذكرت: بنتي هي اللي شفتوه فوق على السطوح وهو مقتول  ومغطينه بملايه، لكن أنا شوفته في المستشفى قبل إما يموت وهو بيقولي عطشان، ملحقتش أجبله مايه وتوفي".

وأضافت" قبل إما ينزل كان حاسس إنه هيموت، قلبي اتحرق عليه ومش قادرة أقوم من مكاني من ساعة إما توفي، كان هو صاحبي وسندي اللي بشكيلوه همومي ويحلهالي، كان راجل البيت وبيساعد أبوه وأخته بفلوس".

وقالت والدة المجني عليه: أطالب بالقصاص من 4 متهمين اللي  قتلوه ابني غدر في منزلهم، وهو كان رايح بنيه التصالح، لكن هما كانوا بيغيروا منه ومتعمدين قتله".

بداية الواقعة عندما تلقي قسم شرطة شبرا الخيمة ثان بمحافظة القليوبية، بلاغ بمصرع شاب يدعى محمد فيشاوي 23 عاما، إثر إصابته بطلق ناري فرد خرطوش.

علي الفور انتقلت الأجهزة الأمنية لمكان الحادث وتبين نشوب مشاجرة مع 4 أشخاص من بينهم صديقه، بسبب خلافات بينهم، فأطلق عيار ناري فرد خرطوش أودى بحياته.

جرى نقل الجثة لمستشفى، تحت تصرف النيابة العامة والتي أصدرت قرارها السابق.