"أنت فعلًا مش تربيتي".. والد حسام حبيب يهاجمه بعد تصريحاته الأخيرة

قام الفنان حسام حبيب بمداخلة هاتفية في برنامج الحكاية مع الإعلامي عمرو أديب، قام بإدلاء عدة تصريحات حول أزمتة الأخيرة مع الفنانة شيرين عبد الوهاب، وقام والده بمهاجمته.

قال حسين حبيب والد الفنان حسام حبيب عبر حسابه الشخصي على فيسبوك: قولوا الحق ولو على أنفسكم، هو ينفع أخالف شرع ربنا بحجة إنى أحمي أولادي البنات؟، ليها الثلثين والأهل ليهم الثلث بعد عمر طويل، وده يخلي الأهل راضيين ويراعوا البنات بعد عمر طويل، ودي صلة رحم، وغير كده يزرع العداوة بين الأهل.

وهاجم ابنه قائلًا: أنت كده مش بتحافظ على مال زوجتك، أنت بتخالف شرع ربنا والنتيجة إنهم فضحوها وقضوا على مستقبلها، وزرعت العداوة بينهم وحطمت زوجتك بجهلك بشرع ربنا، ولو كنت بتسأل أبوك كان أرشدك للحق والكل طلع كسبان يا قاطع صلة الرحم وعاصي أبوك، ضيعت نفسك وضيعت البنت معاك، هو ينفع أخوها بقاله أكتر من 20 سنة بيراعي أخته وهي مصدر رزقه، آجي أقفل عليه الحنفية ويقعد أربع سنين من غير شغل وراجع تاني تقفل عليه الحنفية هو وأمه وأخته وعايزه يسيبك، يا ناوي على قوتي يا ناوي على موتي، الزوج يتعوض الأم والأخ ما يتعوضوش، كلمة حق لوجه الله، والدين النصيحة.

وأكمل، أنت بتقول لما رجعت ليها العربية، واحد بيشتغل معاها أخد العربية اللي بخمسة مليون وقالها هابقي أديكي بيها شغل، وواحد محاسب تعرفه قريب شكالها حاله أعطت له 100 ألف دولار وخلع، وإنها بتكتب شيكات للناس على بياض، إنت كده بتدي مبرر لأهلها يحجروا عليها وبتطلعها إنها سفيهة وعبيطة، وأنا من معرفتي بيها أنها واعية وناصحة، بتيجي تكحلها تعميها، إسأل أبوك يقولك تقول إيه، بقول انك عمرك ما اخدت منها فلوس وانك ما بتشتغلش 4 سنين كنت عايش على قفا مين وهيا قالت لي يابابا انا عايزه اتجوز راجل يصرف عليا، وقلتله عايزك تشتغل وتصرف على بيتك عشان تكبر في نظر مراتك وتحترمك، الحب وحده لا يكفي، اخدت مني مليون جنيه عشان تشطب فيلتك وما تعيشّ في بيت مراتك وها اردهملك، ومن ساعه ما اتطلقت، وأنا بصرف عليك ورايح تقول لعمرو اديب وتهاجمني، لتاني مره أنك ماتعرفنيش من 14 سنة، اه ما بتعرفنيش إلا للمصلحة، وعشان تاخد فلوس، وما دخلتش بيتى سبع سنين وجيت بس تاخد فلوس وقلت ما بتشتغلش عشان شيرين ومشاكلها كانت شغلاك، بقالك سنة مطلقاها ما اشتغلتش ليه بطل حجج، وخليك راجل انت فعلا مش تربيتي، أنت طلعت من بيت مامي على بيت مراتك يا أخي عرتنا.