نجوم الفن يساندون رامي جمال بعدما إعلن إصابته بـ"البهاق" وتفكيره في الاعتزال
دعم مجموعة من الفنانين في الوسط الفني الفنان رامي جمال بعد إعلان إصابته بمرض البهاق، وظهور بقع بيضاء على جسده ودخوله في حالة من الحزن الشديد بسبب صعوبة ظهوره أمام الجمهور مما دفعه إلى فكرة الاعتزال، ليتفاعل العديد من الفنانين معه قائلين "بنحبك زي ما أنت".
الفنانة لطيفة تدعم رامي جمال
أعلنت الفنانة لطيفة دعمها للفنان "رامي جمال"، قائلة: "حبيب قلبي يا رامي يا مبدع يا محترم يا مختلف، اوعى تفكر كدة، أول حاجة لازم تقول الحمدلله على كل حاجة ربنا يكتبهالنا، تاني حاجة، دي حاجة حصلت لناس كتير، وتعالجت منها الحمدلله، وبعدين احنا بنحبك على موهبتك وفنك الرائع وكل جمهورك، وأنا منهم، بنبقى مستنيين جديدك دايمًا".
الفنان محمد نور يدعم رامي جمال
واستنكر الفنان محمد نور، ما ذكره "رامي جمال" بشأن تفكيره في الاعتزال، قائلًا: "إيه اللي أنت بتقولهً ده دي حاجة عادية زي أي حاجه، أنت جميل، وكل الناس بتحبك، فنان كبير، وأنا من أول جمهورك وأول واحد قلتلك لازم تغني".
إيمان العاصي تُساند رامي جمال
ساندت الفنانة إيمان العاصي "رامي جمال"، قائلة: "حبيبي يا رامي، أنت أقوة من أي حاجة، وفنان وموهوب ونجم، وكل ده ولا حاجة قصاد نجاحك وحبك لفنك ربنا يقدرك على الناس عديمة الإحساس، ربنا يخليلك ناريمان بالدنيا".
إليسا تدعم رامي جمال
ودعمت الفنانة اللبنانية إليسا، المطرب رامي جمال بعد إعلان إصابته بمرض البهاق، مطالبة إياه بعدم اعتزال الفن، قائلة: "ممنوع تغيب وممنوع يكون البهاق عذر لغيابك.. إنت بتقول ابتليت بالبهاق، بس مش سبب لتخاف وتغيب،في ناس ابتلت بالكذب والخيانة والسرقة وما هزت، وجودك أساسي ومتل ما إنت بتقول، أصل الحكاية مش حكاية شكل.. حكاية روح".
وقال الشاعر "تامر حسين": "يا روما يا حبيبي يا صديقي المُحترم، ربنا يعافيك ويشفيك الناس، حبيت فنك وألحانك شخصيتك سيرتك الباقي كله والله شكليات وربنا يفرحك ويطمنك وكل أخواتك وحبايبك في ضهرك دايماً".
ودعت الفنانة إيمي سالم "رامي جمال" لاستكمال فنه وإبداعه بقولها: "كمل، لازم تغني واعمل اللي بتحبه، واحنا معاك وفي ظهرك".
تامر حسني يؤازر رامي جمال في محنته
بعث الفنان تامر حسني برسالة دعم إلى الفنان رامي جمال، قال فيها: "إلى الفنان الكبير والصديق الحقيقي والمحترم رامي جمال.. يا حبيبي أنت فنان كبير ومحبوب وليك قيمتك وكل الناس بتحبك ومفيش حاجة هتعطلك عن نجاحك، وتعبك دا لاهو مؤذي ولا مُعدي وكل الناس جواها تعب في منه اللي ظاهر وفي منه اللي مش ظاهر، حتى لو كان تعب نفسي أو مادي".
وتابع "حسني": "كل شخص جواه وجع من حاجة معينة، المهم إننا نبص ونتعلم من اللي ظروفهم أصعب مننا ورغم كدا عندهم صبر وبينجحوا في الاختبار وبيقولوا الحمدلله ومكملين وعندهم إرادة وبينجحوا أكتر من الأول".
وأضاف حسني: "لازم تكمل نجاح يا رامي وشيل أي هلاوس من دماغك واوعى تخبي نفسك.. اللي بيحبك بيحبك لشخصك وفنك صدقني دي حاجة عادية يا رامي والله ملهاش أي تأثير لا عليك ولا على جمهورك بالعكس بقى أنت أكيد شايف الناس كلها طيبين إزاي، ونفسهم يفرحوك وبعدين افتكر إن مايكل چاكسون جاله نفس اللي جالك وبقى أسطورة مبتتكررش خالص وأنت فنان وعارف".
واختتم تامر حسني رسالة دعمه، قائلًا: "أنا واثق إنك مؤمن وبتحمد ربنا وهتقوم وهتكمل وهفكرك قدام كل الناس اللي شايفة كلامي إنك هتنجح أكتر وأكتر وربنا هيكرمك أجمل كرم وهتشوف قريب بحبك يا رامي".
شذى تنصح رامي جمال بعد إصابته بالبهاق
علقت الفنانة شذى على إعلان الفنان رامي جمال إصابته بمرض البهاق، بقولها: "أولًا أنت فنان وفنان مهم وأنت قوي ومن معرفتي بيك أنت إنسان قوي اللي يخاف يسلم ميلزمكش، وأنت لامس قلوب ناس كتير بألحانك وبأغانيك، المرض ده ابتلاء من عند ربنا، وأنت قده فكك من الناس اللي مبتقدرش، دول مش مهمين لأن اللي بيقدروا أكتر بكتير".
وأضافت شذى: "ربنا يكرمك وينجحك أكتر ويخليك لكل الناس اللي بتحبك وأهلك ومراتك، في الناس اللي ملهمش لازمة كلنا عندنا ابتلاءات، بس الناس بتشوف اللي عايزة تشوفوا ومن تجربتي أنا الشخصية في كمية ابتلاء أنا نفسي عشتها تكسر ضهر جمل بقولكً كمل وكلنا في ضهرك إحنا بنقوي بالناس اللي بتحبنا وبتدعمنا والحمد لله على المحن اللي بتعرفنا حبايبنا من أعدائنا.. ربنا يكتبلك الشفا من عندوا هو قادر على كل شيء".
زينة تدعم رامي جمال بعد إصابته بالبهاق
علقت الفنانة زينة على إعلان الفنان رامي جمال إصابته بمرض البهاق، ونشرت الفنانة زينة صورة لمنشور رامي جمال عبر حسابها الشخصي على إنستجرام.
وكتبت زينة: "إنسان محترم ربنا يعفو عنك.. للأسف إحنا في دنيا مبترحمش والنَّاس بقت صعبة فيا ريت نحاول يكون في قلوبنا رحمة، أنت إنسان موهوب يمكن أنا متشرفتش بمعرفتك بس قلبي معاك وأوعى تفكر تتهزم ده مرض عادي وربنا يعفوا عنك وقول الحمد لله والنَّاس الرحيمة كتير واعتبرني من أهلك والإنسان بموهبته واحترامه وأخلاقه وبس".
كان المطرب رامي جمال أعلن إصابته بمرض البهاق، بعد ظهور بقع بيضاء اللون بمناطق بجسده، وذلك خلال حسابه الشخصي على موقع فيس بوك بقوله: "الحمد لله الذي أحبني فابتلاني وقدرني على الصبر.. من فترة ظهرت بقع بيضا في جسمي وبالكشف عرفت إنه مرض البهاق، وجربت أنواع علاج كتير ودكاترة كتير ومفيش فايدة".
وأضاف رامي جمال: "رضيت وسلمت أمري لله عشان عرفت إن الزعل بيزوده وكفاية شغلانتي وصعوبتها والقلق الدائم من المستقبل، وفعلا بقى بيزيد لدرجة لفتت نظر ناس كتير، اللي بقى يقوللي هتتعامل إزاي وأنت فنان واللي يخاف يسلم عليا واللي يسألني هو ده معدي".
وتابع رامي جمال: "أنا بقالي سنة فعلا لو عندي حفلة أو تصوير بتعب على ما أشوف طريقة أخفيه بيها، لدرجة خلت ناس تقولي شوف بيزنس تاني اعمله عشان الناس مش هتقبلك كدة، وفكرت في كلامهم بصراحة".
واستكمل رامي جمال: "لقيت إن عندي حلين يا فعلا شكرا لحد كدة على الشغلانة دي رغم حبي ليها وعدم معرفتي بغيرها، يا إما مش هداريه تاني وتقبلوني بيه وترحموا كل اللي ربنا ابتلاهم بيه من نظرة إن شكله غريب، والحمد لله على نعمة الأهل لأنهم الوحيدون اللي بيقبلوا الواحد زي ما هو".
ما هو مرض "البهاق" الذي أُصيب به رامي جمال؟
البهاق هو موت الخلايا المسئولة عن لون البشرة، والتي تسمى الخلايا الصباغية أو الميلانين، وبمجرد أن تتوقف عن إنتاج الميلانين، تظهر مناطق بيضاء بالبشرة.
أماكن ظهور مرض "البهاق" بالجسم:
- المناطق المعرضة للشمس، مثل اليدين والقدمين والذراعين والوجه.
- حول الفم والأنف.
- الأعضاء التناسلية.
- حول العين.
- حول الأذن.
وقد يتحول شعرك أيضًا إلى اللون الرمادي أو الأبيض إذا كانت المناطق المُصابة بها شعر، بالرغم من أن البهاق يمكن أن يؤثر على أجزاء مختلفة من الجسم، إلا أنها ليست معدية، ولا يمكن لشخص مصاب نقل المرض إلى شخص آخر.
أسباب الإصابة بمرض البهاق
هناك جينات مرتبطة بالبهاق وعوامل وراثية، يكون الأشخاص ذوو التاريخ المرضي العائلي أكثر عرضة للإصابة بالبهاق من غيرهم، لكن من غير المعروف بالضبط ما الذي يسبب البهاق، وقد تكون أسباب البهاق مرضًا مناعيًا يتعامل فيه الجسم مع خلاياه الصبغية كأجسام غريبة ويحاربها.
وأوضح بعض الأطباء أيضًا أن ظهور البهاق قد يكون بعد حوادث:
- التعرض لأشعة الشمس الشديدة مع الأجسام التي لديها استعداد للإصابة بالبهاق.
- التعرض للسموم والمواد الكيميائية.
- مستويات عالية من التوتر.
