"أمهات مصر": الطلاب استخدموا الشنط المدرسية القديمة لمواجهة الغلاء
قالت عبير أحمد، مؤسس اتحاد أمهات مصر للنهوض بالتعليم، إن عدد كبير من أولياء الأمور اضطروا إلى عدم شراء الشنط المدرسية واستخدام القديمة، وذلك بسبب ارتفاع أسعارها خاصة الشنط "الماركة".
ودار حوار ومناقشات بين أولياء الأمور على صفحة اتحاد أمهات مصر للنهوض بالتعليم علي الفيس بوك، حول أسعار الشنط المدرسية وأفضل المواصفات التي يفضلها أولياء الأمور، حيث قالت ولي أمر: "بنجيب شنطة Bz وبتقعد معانه سنتين"، وأضافت أخرى: "هظبط بتوع السنه اللي فاتت هنجيب منين يعني"، وأستكملت أخرى: "جبت السنه اللي فاتت شنط 3m الواحده كانت ب 750 وكويسين زي ما هما هغسلهم بس وهيروحوا السنه ديه بيهم".
وأضافت ولي أمر أخرى: "بنتي راحت k.g 1.2 بنفس الشنطة، وقبلها سنه في الحضانة وكنت مكلماها واقتنعت إن شنطتها كويسه وتروح بيها عادي السنه دي، لسه هاجيب شنطه وهاشتري لأخوها لأني مش ضامنه الأسعار السنة اللي جايه هاجيبهاله واشيلها، وأقل شنطه تعمل من 300 وانتي طالعه، مايهمش السعر قد ما هاحب اجيب شنطه متينه وظهرها مريح اولا ومش مهم بالنسبالي تبقي براند المهم تبقي ماتريال قويه وتستحمل"، وتابعت أخرى: "بجيبها active عشان تعيش والحمد لله عايشة بقالها سنتين، وإن شاء الله مش هشتري السنة دي غير لو لقيت عرض كويس".
وأشارت عبير إلى أن ولي أمر قامت بصنع شنطة كروشية صغيرة للدروس كتجربة ونجحت في صنعها، موضحة أنها قررت عمل شنطة أخرى كبيرة للمدرسة بسبب غلاء الأسعار.
وناشدت عبير تجار الشنط بتخفيض الأسعار وعدم المغالاة في الشنط المدرسية مراعاة لظروف أولياء الأمور، وموجه حديثها لأولياء الأمور قائلة: "متركزوش اوي علي الماركات واشتروا الشنط بالأسعار اللي تناسبكم".
