السيسي: الخدمة المقدمة للناس أمامها مقابل

قال الرئيس عبد الفتاح السيسي، إن أحد أهم أسباب تراجع قدرات الدولة وخدماتها المقدمة للمواطنين، هو أن الدولة لم تكن تستطيع أن تحصل على المقابل لهذه الخدمة، وبالتالي تراجعت.

وأضاف السيسي - خلال كلمة له بالمؤتمر الوطني للشباب، المقام في أسوان - "أنا عاوز دايمًا وإحنا بنتكلم على العطاء، نتكلم على إن إحنا مستنيين إيه مقابل من الناس، مهم قوي إن إحنا نوضح ده للرأي العام في مصر، وإن الخدمة أمامها مقابل، ولو المقابل ده مجاش الخدمة هاتدهور وهاتنتهي".

وتابع: "الخدمة لو ماكنش هايدفع لها المقابل الحقيقي مش الثمن المدعم ده، بنقول بشفافية ومصداقية وبوعي اللي أنت بتتكلم عليه ده تكلفته 4 مليارات دولار تقريبًا دول بكام وعلشان المحطة دي تشتغل بكام علشان تقدر تشتغل طول السنة، طيب يا ترى المقابل ده هانقدر نحصل عليه ولو مقدرناش هاندفعه منين؟.

وأكمل: "ممكن قوي نتكلم على إننا من 2014 بنتحرك بفاعلية لكن أمانة الكلام معاكم يا مصريين بقولكم إن الحكاية مش كده، الدولة كانت بتقدم خدمة للناس ولا تحصل على المقابل لها فكانت تتدهور، إحنا بنتكلم على مرفق السكة الحديد تقريبا يحتاج 180 مليار جنيه، لإعادة تأهيله وماتقدرش تزود قيمة التذكرة، طيب هذا المرفق سيكون شكله إيه هايبقى القطار شكله عامل إزاي، وإذا لم نحصل على القدر اللي إحنا مخططينه على الأقل من المقابل ده مش هايكون لصالحنا".