جريمة جديدة في "التعليم".. مشرفة فصل تحطم "يوسف" نفسيًا ووالدته تستغيث

وكتبت والدة الطالب - عبر الحساب الشخصي لها على موقع التواصل الاجتماعي "فيسبوك" - "مش عارفة ابتدى منين لأول مرة أحس بالعجز وأني مقدرش أكتب حكاية، الحكاية دي حكاية يوسف ابني، دخل مدرسة إشراقة الغد السنة دي KG2 المديرة كلمتني بعد أسبوع، ولمحت إن ابنى ربما يكون مريض عقلي أو بالتحديد متوحد، سمعتها للآخر ورحت لها أنا ووالده تاني يوم، الكلام اتغير إن ابنك طفل ذكي جدًا بس بيعمل تصرفات غريبة شوية، طالبتنا إنه يروح لدكتور نفسي ويكتب لها تقرير وكمان عايزين shadow teacher".

وتابعت: "إدارة المدرسة بتقول إن يوسف طفل عنيف بيضرب زمايله، وسلوكه مش تمام، كنت حاسة إنهم بيتكلموا عن طفل تاني، يقيني إن في حاجة غلط، طلبنا والده وأنا، نشوف الولد من خلال الكاميرات في الفصل، قالوا ممنوع، طالبنا نقرأ تقرير الأخصائية النفسية، قالوا ممنوع  كل حاجة مقفولة عننا، ابني ساكت بس مش سعيد".

وواصلت: التقرير راح للمدرسة، واعتبرنا الموضوع انتهى بس القصة لسة طويلة، باختصار ابتدت مدرسة الفصل تعامل يوسف معاملة قاسية مثلًا في مرة طلبت من الأطفال ميردوش على يوسف لو كلمهم، الأطفال اتخضوا وراحو حكوا لأهليهم، لكن للأسف ابني مبيحكيش وعرفت القصة من أمهات زمايله، إمبارح عرفت إن مدرسة الفصل بتعاقبه أشد عقاب علشان هو طفل حركي، حرمان من نزول الفسحة، طرد من الفصل، بتخلي زمايله يتريقوا عليه ويقولوا له يا بيبي".

واختتمت منشورها، بقولها إنها قامت بعمل شكوى رسمية عن طريق موقع مجلس الوزراء، متابعة: "معاياة شهود من الأطفال عن وقائع كسر ابني وتحطيمه نفسيا".